«Մենք ունեցել ենք որոշ բացթողումներ․ ներողութուն ենք խնդրում ժողովրդից»․ Գևորգ Պապոյան

Այսօր՝ լրագրողների հետ ճեպազրույցում, ԱԺ «Իմ քայլը» խմբակցության պատգամավոր Գևորգ Պապոյանը, անդրադառնալով Ռոբերտ Քոչարյանի և մյուսների նկատմամբ 300․1 հոդվածով քրեական հետապնդումը դադարեցնելու դատարանի որոշմանը և դիտարկմանը, թե երեք տարիների ընթացքում անկախ դատական համակարգ չունենալը իշխանության ձախողումն է, ասաց․

«Ես չեմ ուզում որևէ իրավական որոշման մեջ մտնել, երբ առավել ևս չեմ կարդացել դատարանի վերջնական որոշումը, բայց, այո՛, հասարակությունը շարունակում է ունենալ դժգոոհություն մեր դատական համակարգից»։

Պապոյանն ընդունում է, որ իշխանությունն ունեցել է բացթողումներ, թերացումներ։

«Մենք հանդիպումների ժամանակ այդ մասով ներողություն ենք խնդրում մեր ժողովրդից, որ որոշ խոստումներ չենք կարող իրականացնել և նաև նոր ընտրությունների գնում ենք այդ պատճառով, որ ստանանք վստահության քվե և չկատարած խոստումները հասցնենք կատարել»,- նշեց նա։