«Հայկական քաղաքական վերնախավը չի հասկացել, որ մեր սպառնալիքի աղբյուրը փոխվել է». Հակոբ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրել է. «Պարզապես, հայկական քաղաքական վերնախավն «իքս» պահից սկսած չի կողմնորոշվել կամ հասկացել, որ մեր հակառակորդը, մեր թշնամին, մեր սպառնալիքի աղբյուրը փոխվել է և դա վաղուց Ադրբեջանը չէ, այլ նվազագույնը՝ Թուրքիան, իսկ առավելագույն կամ լայն իմաստով՝ ԽՍՀՄ-ը վերականգնելու ՌԴ վերնախավի կամ նախագահի «սևեռուն գաղափարը»:

Կամ, եթե կողմնորոշվել կամ հասկացել են, չեն ունեցել համարժեք հետևություն անելու բավարար կամք, հեռատեսություն, լայնախոհություն, և շարունակել են աշխարհն ու դրանում առաքելությունը չափել կենցաղ-ժամանցային զվարճանքների մասշտաբով:

Մեծ հաշվով երկրում այդ ամբողջ ընթացքում չի ձևավորվել սպառնալիքի տրանսֆորմացիան խորությամբ պատկերացնող, և, ըստ այդմ, դրան հանարժեք առաքելություն գիտակցող ընդդիմադիր վերնախավ:

Իհարկե, կա նաև մյուս տարբերակը՝ թույլ չեն տվել ձևավորել կամ գիտակցել, կամ ինչպես ասում են՝ «գործակալ» են եղել: Անկեղծ ասած, ես այդ տրամաբանությունը չեմ դիտարկում արդյունավետ ու ռացիոնալ: Որովհետև դա մտածողության էվոլյուցիան փակուղի տանելու ամենակարճ ճանապարհն է: Ոչ այն պատճառով, որ ոչ մի գործակալ էլ չկա, այլ որովհետև մենք միևնույն է չգիտենք և չենք իմանա այդ ամենի մասշտաբը, հետևաբար լուծումներ պետք է փնտրենք չափելի հարթություններում»: