«Եթե 300․1 հոդվածը հակասահմանադրական է ճանաչվում, դեռ չի նշանակում՝ մահվան հանգամանքները չպետք է քննվեն». Ա. Օրբելյան

«300.1 հոդվածի ձևակերպումը, ոչ թե անունը՝ սահմանադրական կարգ տապալել, այլ այն, որ ասում են՝ ինչ պիտի անես, որ համարվի սահմանադրական կարգ տապալել, իր մեջ ունի բազմաթիվ հակասություններ, և պարզ չէ: Դա առաջին օրերից ասել ենք», - այսօր՝ «Ազատության» ռ/կ-ի եթերում ասել է «Կոնցեռն դիալոգի» փաստաբան, երկրորդ նախագահ Ռոբերտ Քոչարյանի պաշտպաններից Արամ Օրբելյանը՝ հավելելով, որ թեև 300․1 հոդվածի մասով գործը փակված է, սակայն «Մարտի 1»-ի գործը շարունակվում է քննվել։

Արամ Օրբելյանը հայտնել է, որ կդժվարանա ասել՝ գործը կբացահայտվի՞, թե չէ, որովհետև քննչական մարմինները պետք է կենտրոնան բոլոր հանգամանքները բացահայտելու համար. «Ցավոք սրտի, քննչական մարմինները կենտրոնացած են տվյալ դեպքում վերջին 3 տարվա ընթացքում պարոն Քոչարյանին և այլ անձանց մեղադրելու մեջ: Ոնենք 180-ից ավելի ոստիկան, որոնք ստացել են վիրավորում, ունենք քաղաքացիական անձ, որը ստացել է տարբեր աստիճանի առողջական վնասվածք։ Ունենք 10 զոհ, ում մահվան հանգամանքները պարզված չեն։ Ունենք բազմաթիվ գույքային վնաս. այրվել են մեքենաներ, խանութներ են թալանվել և այլն։ Տեղի են ունեցել զանգվածային անկարգություններ, խոսքը գնում է 2008 -ի մարտի 1-ի երեկոյան մասին, ոչ առավոտվա: Եթե 300․1 հոդվածը հակասահմանադրական է ճանաչվում, որովհետև որոշակի չի, դա չի նշանակում, որ անձանց մահվան հանգամանքները չպետք է քննվեն»,- ասել է նա:

Մանրամասները՝ տեսանյութում: