«Մեզ մոտ ամեն ինչ գրված էր. մենք ոչ մի հարցում չենք սխալվել». Օնիկ Գասպարյանի խորհրդական

«Մեզ մոտ ամեն ինչ գրված էր։ Ես կարող եմ հավաստիացնել, որ մենք ոչ մի հարցում չենք սխալվել։ Միգուցե ինչ-որ մեկին այժմ սա դուր չգա։ Կգոռան, թե ինչու առաջինը չենք հարվածել, ինչու այսպես կամ այնպես։ Ես պետք է հիշեցնեմ, որ պատերազմում են առաջին հերթին ոչ թե բանակները, այլ պետությունները»,- «Սպուտնիկ Արմենիայի» եթերում ասել է ՀՀ ԶՈւ Գլխավոր շտաբի նախկին ղեկավար Օնիկ Գասպարյանի խորհրդական Վլադիմիր Պողոսյանը՝ հավելելով, որ մեր դեպքում պետությունը չէր պատերազմում։

«Պատերազմի օրերին, երբ Արցախից Երևան էի գալիս, տեսնում էի, որ մարդիկ չեն հասկանում իրավիճակի լրջությունը, մայրաքաղաքում քաղաքացիների մոտ չէի տեսնում գիտակցումը, որ Ադրբեջանի հետ ընթանում է ծանր, արյունահեղ պատերազմ», - ասել է Պողոսյանը։

Եթերի ընթացքում նա հայտնել է, որ ինքը դեռ մինչև մարտական գործողությունների մեկնարկն էր ասել, որ պատերազմ լինելու դեպքում պետք է անջատել համացանցը, այն թողնել միայն անձանց և կառույցների մոտ, որոնց դա անհրաժեշտ է պետական անվտանգության նկատառումներից ելնելով։ Բայց դա չարվեց։

«Անշուշտ, հակառակորդի քիբերստորաբաժանումներն ակտիվորեն օգտվեցին դրանից։ Երբ ամբողջ հայ ազգը նստած էր ֆեյսբուքում և Youtube–ում, ադրբեջանցիները զանգվածաբար հրապարակում էին տեսահոլովակներ՝ գերիներին ծեծելու և խաղաղ քաղաքացիների սպանությունների, հայ զինվորներին և տեխնիկային անօդաչու թռչող սարքերով հարվածելու տեսարաններով։ Հասկանալի է, որ այդ ամենը խուճապ և սարսափ էր տարածում հայ հասարակության մեջ։ Եվ բանակ զորակոչված մարդիկ, պահեստազորը առաջնագիծ էին գնում արդեն հոգեբանորեն կոտրված»,- ասել է Օնիկ Գասպարյանի խորհրդականը։

Մանրամասները՝ տեսանյութում: