«Ասում են՝ ուղղորդված են եղել ցույցերը, այդ ո՞ւմ կողմից են ուղղորդվել, եթե այցի մասին նախապես չի ասվել»․ նախկին իմքայլական

Նախկին իմքայլական, այժմ ԱԺ անկախ պատգամավոր Աննա Գրիգորյանը նույնպես ՔԿ-ի մոտ է։ Լրագրողների հետ զրույցում պատգամավորը նշեց, որ որոշ սյունեցիների և Մեղրու քաղաքապետին բերման ենթարկելը ընտրություններից առաջ քաղաքական հակառակորդներին լռեցնելու փորձ է։

Անդրադառնալով Նիկոլ Փաշինյանի՝ Սյունիք այցին, Գրիգորյանը նշեց, որ ոչ ոք, նույնիսկ իմքայլականները չեն իմացել, որ վարչապետը մեկնելու է Սյունիք։

««Իմ քայլից» Կարեն Համբարձումյանն ասում է, որ երբ նրան լրագրողը զանգահարել և հարցրել է, թե գիտե՞ր, որ վարչապետը Սյունիք է մեկնում, ասել է, որ չգիտի և ինքն այդ պահին պատրաստվում է գնալ․․․ Բոլորի համար անակնկալ է եղել, իսկ եթե որևէ մեկը տեղյակ չէր սրա մասին, ապա այդ ինչպե՞ս է ստացվում, որ ասում են՝ ուղղորդված են եղել ցույցերը, այդ ո՞ւմ կողմից են ուղղորդված եղել, եթե դրա մասին նախապես չի ասվել»,- նշեց պատգամավորը։