«Ամենալուրջ քննադատությունն այն էր, որ Գանդին եղել է Աթաթուրքի ընկերը․ իսկ կարո՞ղ է չգիտեք՝ ովքեր են Էրդողանի ու Ալիևի ընկերները»․ Մովսես Հարությունյան

Քաղաքագետ Մովսես Հարությունյանը ֆեյսբուքյան իր էջում գրել է․ «Հայաստանում վանդալիզմի է ենթարկվել Մահաթմա Գանդիի արձանը, ու սա այն բանից հետո, երբ հայ-հնդկական հարաբերությունների զարգացման որոշակի նոր եզրեր էին նկատվում (Իրանում Հնդկաստանի դեսպանն ասել է, որ Հնդկաստանը ծրագրում է Հնդկական օվկիանոսը Եվրասիայի հետ կապել Հայաստանի տարածքով)։
Չհաշված նաև, որ օրեր առաջ Հնդկաստանի դեսպանությունն առաջին անգամ օգտագործեց «Ցեղասպանություն» եզրույթը։
Քանի շարունակում ենք ձևը գերադասել բովանդակությունից, ունենալու ենք նման պատկերներ.
թուրքական հագուստ հագնելով՝ թուրքական կտորից պատրաստված թուրքի դրոշն ենք վառում,
պատերազմի ժամանակ նկուղ մտնելով՝ դրանից հետո պատերազմի հրձիգի դեր ենք ստանձնում,
հայրենիքի փրկության ժամին երկրից անհետացած՝ ֆեյսբուքով հայրենիք փրկելու կոչեր ենք անում։
Հ.Գ. Ու հա, Գանդիի արձանի դեմ հնչող ամենալուրջ քննադատությունն էլ այն էր, որ նա եղել է Աթաթուրքի ընկերը։ Վայ, իսկ կարո՞ղ է չգիտեք, թե ովքեր են Էրդողանի ու Ալիևի ընկերները... Վստահ եմ, որ համարձակություններդ չի հերիքի նրանց ընկերների հասցեին թթու խոսք ասել՝ անգամ եթե վերջիններս վիրավորեն ձեր ազգային ինքնասիրությունը»։