«Վանեցյանը ժամանակին գիտակցեց նորելուկ շնագայլերի ողջ էությունը»․ Սերժ Սարգսյան

«Դաշինք կազմող մեր երկու քաղաքական ուժերին միավորում են իրավիճակի սթափ գնահատման արդյունքում Հայաստանի ներքին և արտաքին վտանգների, առկա մարտահրավերների, դրանց հաղթահարման ուղիների և ապագայի վերաբերյալ նույնանման մոտեցումներն ու ընդհանուր մտահոգությունները, ինչպես նաև ազգային արժեքների պահպանման դիրքերում ամուր և աննահանջ կանգնելու վճռականությունը»,- այսօր՝ «Պատիվ ունեմ» դաշինքի հուշագրի ստորագրման արարողության ժամանակ հայտարարեց ՀՀ երրորդ նախագահ Սերժ Սարգսյանը։

«ՀՀԿ-ն իր փորձը, գիտելիքն ու կարողությունները, պահպանողական գաղափարախոսությունը համադրում է երիտասարդ քաղաքական ուժի՝ «Հայրենիք» կուսակցության թարմ մոտեցումների, համարձակ նախաձեռնությունների, նոր ավյունի ու եռանդի հետ՝ վստահությամբ, որ կուսակցությունն իր երիտասարդ, բայց պետական համակարգում ճանապարհ անցած առաջնորդի՝ Արթուր Վանեցյանի գլխավորությամբ հանրապետականների հետ կդառնա ամուր և ժամանակակից պետություն կառուցելու ջատագովն ու առաջամարտիկը»,- նշեց նա։

«Երբեմն լսում եմ կարծիքներ, թե՝ Վանեցյանը, որպես ԱԱԾ տնօրեն, հետապնդումների առաջամարտիկ էր, ինչպե՞ս եք նրա հետ դաշինք կազմում․․․ Շատ պարզ․ Արթուր Վանեցյանը ժամանակին գիտակցեց նորելուկ շնագայլերի ողջ էությունը, անձամբ կանգ առավ և կոչ արեց նաև մյուսներին։ Ավաղ, նրան չլսեցին»,- հայտարարեց Սարգսյանը։