Տիգրան Խզմալյանի բաց նամակը՝ Արմեն Սարգսյանին

173

Երկուշաբթի, 17 մայիսի, 2021 թ., 16:30

Եվրոպական կուսակցության նախագահ Տիգրան Խզմալյանը բաց նամակ է հղել Հայաստանի Հանրապետության նախագահ Արմեն Սարգսյանին. «Դիմում եմ Ձեզ խնդրանքով՝ անհապաղ բարձրացնել ՄԱԿ Անվտանգության խորհրդում ՀՀ տարածքային ամբողջականությունը և պետական ինքնիշխանությունը պաշտպանելու նպատակով միջազգային խաղաղապահներ տեղակայելու հարցը, ինչպես նաև Արցախյան կարգավորման Մինսկի խմբի ձևաչափը վերականգնելու պահանջը։ Ֆրանսիայի և ԱՄՆ իշխանություններն արդեն արտահայտվել են դրա օգտին և անկասկած աջակցելու են Ձեր՝ նման նախաձեռնությանը։

Վարչապետի ԺՊ Փաշինյանի դիմումը ՀԱՊԿ-ին և ՌԴ իշխանություններին այս պայմաններում նման է ծաղրի, քանի որ հենց ՌԴ ղեկավարությունն է համակարգում ՀՀ դեմ իրականացվող ռազմական և քաղաքական սադրանքները։

2020թ․ նոյեմբերի 9-ին կատարված պետական դավաճանությունից և փաստացի հեղաշրջումից հետո, երբ վարչապետի ԺՊ Փաշինյանը ոտնահարեց ՀՀ Սահմանադրության 116-րդ հոդվածը, կոպտորեն չարաշահելով իր լիազորությունները, Դուք մնում եք ՀՀ միակ բարձրաստիճան պաշտոնյան, ով հավատարիմ է մնացել ՀՀ Սահմանադրությանը և իր պարտքին ազգի առջև։

Հայաստանի Եվրոպական կուսակցությունը հորդորում է Ձեզ օգտագործել Ձեր բոլոր լիազորություններն ու քաղաքական փորձը՝ միջազգային իրավունքի միջոցներով մեր երկրին սպառնացող վտանգը չեզոքացնելու համար»։