«Մեդիատեռորն իշխանության թույլության և սխալ տեղեկատվական քաղաքականության արդյունք է». լրագրող

Լրագրող Գևորգ Թոսունյանը ֆեյսբուքյան իր էջում գրել է. «Քանի որ իշխանությունից սկսել են ամենօրյա ռեժիմով օգտագործել մեդիատեռոր հասկացությունը, ուզում եմ այսօրվա մի պարզ օրինակի վրա ցույց տալ, թե իրականում որոնք են դրա ծագման պատճառները՝ նպատակ ունենալով սիրելի իշխանությանը հասու դարձնել այն միտքը, որ այդ մեդիատեռորն իրենց իսկ թույլության և սխալ տեղեկատվական քաղաքականության արդյունքում է առաջանում, ինչից տուժում է հանրությունը։ Այսպես, երեկ պարզվում է, ըստ պաշտոնական աղբյուրների, որ Վարդենիսի հատվածում հայ և ադրբեջանցի զինվորականների միջև վիճաբանություն է եղել։ Այս ինֆոն պաշտոնապես երեկ չի հաղորդվում։ Այն տիրապետել են մի քանի պետական մարմիններ։ Ու հանկարծ այսօր ինֆոն տարածում է «Դեժավյու» թելեգրամյան էջը՝ իհարկե ծաղկացնելով, համեմելով որոշ սկանդալային ինֆոյով ու իշխանության չսիրած մեդիատեռորի կոմպոնենտներով։ Սա ժամեր անց հերքում են ՊՆ-ից։
Ինչ կարելի էր անել սա կանխելու համար. շատ պարզ, մարդկանց անմիջապես հայտնել իրողությունը, առավել ևս, երբ շատ լավ գիտես, որ իշխանության ներսում միգուցե վերին, միգուցե ստորին օղակներում սիրով աջակցում են այդ մեդիատեռորին։
Այնպես որ, սիրելի իշխանություն, երբեմն միտումնավոր, երբեն ոչ, մարդկանց մի ենթարկեք մեդիատեռորի:
Հիմա կա նոր մեդիատեռորի նոր առարկա՝ Հրանտ Բագրատյանը հայտարարել է, որ ադրբեջանական կողմը հայերին 10 օր ժամանակ է տվել, հակառակ դեպքում կփակի Գորիս-Կապան ճանապարհի՝ իրենց վերահսկողության տակ հայտնված հատվածը, ինչքան իշխանությունն ուշանում է, այնքան ավելի է մեդիատեռորի ենթարկում հանրությանը»։