«ԼՀԿ-ն առաջարկում է փոխել ՀՀ սահմանադրությունը». Գևորգ Գորգիսյան

«Լուսավոր Հայաստան» կուսակցության կառավարման խորհրդի անդամ Գևորգ Գորգիսյանն այսօր կուսակցության 3-րդ համագումարի ժամանակ ներկայացրեց «Լուսավոր Հայաստանի»-ի ծրագիրը։ Գորգիսյանը նշեց, որ վերջին շրջանում քաղաքացիներին համոզում են, որ ընտրությունը պետք է լինի վատի և վատագույնի, հնի և գործողի, սևի և սպիտակի միջև. ««Լուսավոր Հայաստան»-ը այս արատավոր շղթան պետք է ջարդի ու մենք հայտարարում ենք, որ կա այլընտրանք ու այդ այլընտրանքը ձևավորելու համար մենք ապավինում ենք մեր քաղաքացիներին՝ նրանց կոչ անելով վերցնել իրենց վրա պատասխանատվությունը Հայաստանի ապագայի համար, գնալ ընտրատեղամաս և քվեարկել։ Եվ մենք կոչ ենք անում քվեարկել ոչ թե ընդդեմ ինչ-որ մարդկանց, ընդդեմ ինչ-որ գաղափարների, այլ քվեարկել հանուն»,- ասաց Գորգիսյանը։
Նա հայտնեց, որ «Լուսավոր Հայաստան»-ը առաջարկում է փոխել Սահմանադրությունը. «Առաջարկում ենք ընդլայնել նախագահի և խորհրդարանի լիազորությունները, վերականգնել գյուղատնտեսության, սփյուռքի և մշակույթի նախարարությունները, բնականաբար, ավելի արդյունավետ կառուցվածքով»,- նշեց Գորգիսյանը։