«Երկու հարց՝ ՀՀ ՊՆ պաշտոնակատար իշխանությանը»․ Նարինե Դիլբարյան

«Ժառանգություն» կուսակցության նախկին նախագահ Նարինե Դիլբարյանը ֆեյսբուքյան իր էջում գրել է. «Երկու հարց՝ ՀՀ ՊՆ պաշտոնակատար իշխանությանը, որը երեկ եռանդուն նյութ էր տարածում, որ ադրբեջանական զինուժի «մի մասը» վերադարձել է ելման դիրք՝ լքելով ՀՀ ինքնիշխան տարածքը, ընդ որում խրոխտ նշվում է՝ «Սյունիքի մարզի Սև լճի մոտ 1000-ից ավելի ադրբեջանցի զինվորական կա» լուրը չի համապատասխանում իրականությանը», ինչո՞ւ գոնե երկրորդ հաղորդագրությամբ հստակ չի նշում, թե այդ մի մասը ի՞նչ է նշանակում՝ 998-ն է՞ին, 100 գնացին, 898-ը մնացի՞ն, թե՞..., ապա՝ ՀՀ տարածքի ո՞ր հատվածից են դուրս եկել ներխուժողները՝ Սյունիք, Գեղարքունիք: Նման տիպի անորոշ տեղեկատվական բովանդակությամբ հաղորդագրությունները PR հնացած դասագրքերում համարվում են իրականության պատկերը քողածածկելու միջոց, ուշադրությունը ռեալ վիճակից շեղելու հնարք, բայց 21-րդ դարում պատերազմից հետո գերընդլայնված և չկահավորված սահմաններ ունեցող, գերիների վերադարձին սպասող և կենսական օգտագործման հողը, ենթակառուցվածքները, տունը կորցնող պետության մեջ այն առաջացնում է ավելի մեծ տագնապ և համոզում, որ իրեն վերստին խաբում են կառավարման հանցավոր անգործունեությունն արդարացնելու համար»: