«3500-ից ավելի դիակի և մասունքների փորձաքննություն է կատարվել մեր հիմնարկի կողմից». դատաբժշկական փորձագետ

«Մինչ օրս 3500-ից ավելի դիակի և դիակի մասունքների փորձաքննություն է կատարվել մեր հիմնարկի կողմից: Զինվորների դիակների փորձաքննությունները սովորական փորձաքննություններ չէին, այլ դրանք ամբողջովին մասնատված, աուտոլիտիկ նեխային կազմափոխման ենթարկված դիակներ էին: Փորձեցինք այդ բարդագույն փորձաքննությունն իրականացնել և մեր հերոսների ծնողներին հանձնել նրանց որդիների դիակները»,- այսօր հրավիրած մամուլի ասուլիսի ժամանակ ասաց Հանրապետական դատաբժշկական կենտրոնի Արարատի մարզային բաժնի վարիչ, դատաբժշկական փորձագետ Արմեն Գևորգյանը:

Անդրադառնալով Աբովյանի դիահերձարանին առնչվող դեպքին՝ դատաբժիշկն ասաց, որ հարուցված է քրեական գործ. «Քանի որ գործը գտնվում է նախաքննության փուլում, ուստի այս գործին առնչվող որևէ հայտարարություն, որևէ ենթադրություն անելու իրավունք չունենք»,- նշեց նա: