«Կեղծ փաստաթղթերով Միհրան Պողոսյանն ուզում էր հիմնավորեր, որ ՌԴ-ում գտնվել է ոչ թե թաքնվելու, այլ՝ ուսման նպատակով». Դանիել Իոաննիսյան

ԻՔՄ ծրագրերի համակարգող, Հանրային խորհրդի անդամ Դանիել Իոաննիսյանը ֆեյսբուքյան իր էջում գրել է. ««Անկախ դիտորդ» դաշինքը հանցագործության մասին հաղորդում է ուղարկել ՀՀ գլխավոր դատախազին՝ կապված Միհրան Պողոսյանի (կամ նրա ներկայացուցչի) կողմից առերևույթ փաստաթուղթ կեղծելու դեպքի հետ:

Մասնավորապես, Միհրան Պողոսյանի՝ ԱԺ պատգամավորի թեկնածու առաջադրվելու համար վերջին 4 տարում ՀՀ-ում մշտապես բնակվելու տեղեկանք ստանալու նպատակով, ըստ առկա տվյալների, մեզ համար անհայտ անձանց կողմից պատրաստվել է Մոսկվայի պոլիտեխնիկական համալսարանի «0089-ОД» կեղծ հրամանը և նույն բուհի՝ «թիվ 1427» կեղծ տեղեկանքը:

Նշված փաստաթղթերի կեղծ լինելը հիմնավորվում է նրանով, որ Մոսկվայի պոլիտեխնիկական համալսարանը հերքել է դրանց գոյությունը:

Նշված կեղծ փաստաթղթերով Միհրան Պողոսյանն ուզում էր հիմնավորեր, որ Ռուսաստանում գտնվել է ոչ թե հետախուզումից թաքնվելու, այլ՝ ուսման նպատակով:

Ընդ որում՝ այս տեղեկանքի ֆեյք լինելը բացահայտվելուց հետո Միհրան Պողոսյանի ներկայացուցիչը մեկ այլ բուհի տեղեկանք է ներկայացրել ՀՀ ոստիկանություն, որի իսկությունը դեռ պետք է պարզել... Բայց նախքան այդ, այդ այլ բուհի տեղեկանքի հիման վրա Միհրան Պողոսյանն արդեն պատգամավորի թեկնածու է»: