«Անձնագրերի և վիզաների վարչությունն ապօրինություն է անում». Վարդևանյանն ահազանգում է

«Հայաստան» դաշինքի նախընտրական կենտրոնական շտաբի պաշտոնական ներկայացուցիչ Արամ Վարդևանյանն այսօր մամուլի ասուլիսի ժամանակ հայտնեց, որ իրենք խախտումներ են արձանագրել Ոստիկանության անձնագրերի և վիզաների վարչության կողմից:

«Ոստիկանության անձնագրերի և վիզաների վարչությունն ապօրինաբար մեկ դեպքում Արցախից ժամանած մեր հայրենակիցներին տրամադրում է տեղեկանք՝ ժամանակավոր ընտրողների ցուցակում ընդգրկվելու և ընտրություններին մասնակցելու համար, մեկ այլ դեպքում պարզապես մերժում է: Այսինքն՝ վարչությունը որոշել է ԸՕ կարգավորումները անտեսել և իր սեփական հայեցողությամբ մե՛կ որոշում է, որ այս անձը կարող է մասնակցել, իսկ մեկ այլ դեպքում որոշում է որ չի կարող մասնակցել: Ես ուզում եմ հասկանալ՝ ինչ ստանդարտով են դա որոշում: Այսինքն՝ կարո՞ղ ա հարցնում են՝ մի հատ կասեք ում եք ընտրելու ու ըստ դրա որոշում են՝ տան համապատասխան հնարավարությունը, թե ոչ: ԿԸՀ-ն պարտավոր է այս հարցի վերաբերյալ արձագանք ներկայացնել, որովհետև խոսքը հազարավոր մարդկանց մասին է գնում»,- հայտարարեց Վարդևանյանը: