«Չարքարշ, տանջված, կոշտուկներոտ ձեռներով մարդկանց ցույց են տալիս, ասում՝ հլը տեսեք, թե ովքեր են Նիկոլի ընտրողները». Փաշինյան

Գեղարքունիքի մարզի Նորատուս համայնքում քարոզարշավի ժամանակ «Քաղաքացիական պայամանագիր» կուսակցության վարչապետի թեկնածու Նիկոլ Փաշինյանը հայտարարեց, թե իրենց որոշ քաղաքական հակառակորդներ փորձում են ծաղրել՝ ցույց տալով, իր բնորոշմամբ, «չարքարշ մարդկանց»:

«Մեր որոշ քաղաքական հակառակորդներ, փորձելով իբր մեզ վնաս հասցնել, գնում են գյուղերում չարքարշ մարդկանց տներում նկարահանումներ են անում, նրանք էլ ասում են՝ Նիկոլին ենք ընտրելու, և այդ չարքարշ, տանջված, աշխատավոր, կոշտուկներոտ ձեռներով, կնճիռներոտ դեմքերով մարդկանց ցույց են տալիս, ասում՝ հլը տեսեք՝ ովքեր են Նիկոլի ընտրողները: Գիտեք ինչ, ես անկեղծ ասեմ՝ ինձ համար մեծ հպարտություն է, որ էդ մարդիկ, որոնք հույս են փնտրում ամեն օր, էդ հույսը կապում են մեր քաղաքական ուժի հետ, և հատկապես էն մարդիկ, ովքեր հույսի ու աջակցության կարիք ունեն»,- ասաց Փաշինյանը: