«Վերջապես կիմանանք ՀԱԿ-ի և ԲՀԿ-ի իրական ընտրազանգվածների թվերը»․ Հրանուշ Խառատյան

Ազգագրագետ Հրանուշ Խառատյանը ֆեյսբուքյան իր էջում գրել է. «Դատելով հաշվարկի ներկա պահի արդյունքներով՝ ծանր, դժվար, ոչ կառուցողական խորհրդարան է լինելու: «Այո» ընտրողների զգալի մասը իրականում «ոչ» է քվեարկել հակոտնյա ուժին: Ընդ որում Պատիվ ունեցողների ու «Հայաստան» դաշինքի մի մասի ձայները ևս միմյանց դեմ հակոտնյա «ոչ» ձայներ են: «Հայաստան»-ի ձայներն ըստ երևույթին 50/50 են՝ դաշնակցությունն ու ՌՔ-ն: Հավանաբար կարելի է խոսել նաև այն մասին, որ վերջապես կիմանանք ՀԱԿ-ի և ԲՀԿ-ի իրական ընտրազանգվածների թվերը:
Բոլոր դեպքերում ուրվագծվող խորհրդարանը թվում է՝ միայն մի հարցում է համագործակցելու՝ ռուս-թուրքական համաձայնությունների շուրջ: Ենթադրելի է, որ պատերազմից հետո ստեղծված իրավիճակի հանգուցալուծմանը երրորդ կողմի, այդ թվում ՄԱԿ, ԵԱՀԿ, մասնակցության հնարավորությունը կհասցի նվազագույնի:
Երկրի զարգացման ներքին խնդիրներում ուրվագծվող խորհրդարանի հնարավոր ուժերից երեքը ամեն կերպ խոչընդոտելու են խորհրդարական մեծամասնությանը՝ նրա հաղթանակը դարձնելով պյուռոսյան: Ներխորհրդարանական կատաղի պայքար է սպասվում:
Արդյունքում երկրի հասարակական պառակտումը իր ողջ «շքեղությամբ» կտեղափոխվի օրենսդիր մարմին: Դժվար ժամանակներ են լինելու»: