«Այսպիսի քվեարկության պատճառներից մեկը հետևյալն է՝ ստեղծվեց մտահոգություն, որ հները վերադառնում են»․ Ռ․ Քոչարյան

«Ակնհայտ էր, որ քվեարկության վրա ազդել է որոշակիորեն սոցիալական հատկանիշով բևեռացումը մեր հասարակության մոտ։ Սա փաստ է, վատ փաստ է, այդպես չպետք է լիներ, բայց այդ տրամադրությունն ստեղծվել է հենց իշխանական քարոզիչների կողմից։ Եվ մենք պետք է անենք ամեն ինչ, որ այդպես ապագայում չլինի»,- այսօր «Հայաստան» դաշինքի ընդհանուր ժողովի ժամանակ ասաց դաշինքի առաջնորդ, ՀՀ երկրորդ նախագահ Ռոբերտ Քոչարյանը։

«Հաջորդ պատճառը հետևյալն է՝ ստեղծվեց մտահոգություն, որ հները վերադառնում են։ Այդ մտահոգությունը կար իշխանության քարոզչության կողմից, բայց այն ուժեղացավ, երբ երեք նախագահներն իրենց դեմքով մասնակցում էին ընտրություններին և քարոզարշավին։ Սա ևս փաստ է և մենք անկեղծ պետք է այս փաստի մասին խոսենք»,- ասաց նա՝ ընդգծելով, որ պատճառներից մեկն էլ այն է, որ ժողովուրդը մեծ տեղեկատվական ճնշման է ենթարկվել։