«Ինքնակամ կառույցներին վերաբերող նախագիծը նպատակ ունի փակել օրենքով թողնված սողանցքը». Նիկոլայ Բաղդասարյան

Հայաստանի Հանրապետության քաղաքացիական օրենսգրքում փոփոխություն կատարելու մասին օրենքի նախագիծն ԱԺ արտահերթ նիստում ներկայացրեց համահեղինակ Նիկոլայ Բաղդասարյանը:

«Այս նախագիծը քննարկելիս մեկ հարցի պատասխան պետք է տալ՝ կո՞ղմ եք ինքնակամ կառույցներին, թե՞ դեմ եք: Նախագիծը վերաբերում է բացառապես պետական և համայնքային հողի վրա ինքնակամ կառույց կառուցելուն»,- ասաց Իմքայլական պատգամավորը:

Պատգամավոր Բաբկեն Թունյանը նշեց, որ օրենքի ընդունումից հետո համայնքային կամ պետական սեփականություն հանդիսացող հողի վրա ցանկացած ինքնակամ կառույց այլևս ոչ մի դեպքում օրինականացման ենթակա չի լինի:

Նիկոլայ Բաղդասարյանի մեկնաբանմամբ, դա կվերաբերի այն կառույցներին, որոնք կառուցապատումը կսկսեն օրենքն ուժի մեջ մտնելու հաջորդ օրը: «Նախագիծը նպատակ ունի փակել օրենքով թողնված սողանցքը»,- նշեց նա՝ հավելելով, որ նախագծի ընդունումից հետո համայնքային և պետական սեփականություն հանդիսացող հողի վրա ինքնակամ ցանկացած կառույց օրինականացման ենթակա չի լինելու: