«Տպավորություն է, որ Էրդողանին արվել է առաջարկ, որից նա չի կարող հրաժարվել». Հակոբ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրել է. «Լավրով-Չավուշողլու անթալիական հանդիպումից թերևս շատ ավելի ուշադրության է արժանի այդ հանդիպմանը զուգահեռ Թուրքիայի պաշտպանության նախարարի միջինասիական այցը: Նա եղել է Կիրգիզիայում, հետո ժամանել Տաջիկստան: Թուրքիայի միջինասիական հավակնության մասին արտահայտվել եմ 44-օրյա պատերազմի ավարտից հետո՝ նշելով, որ Թուրքիան Կովկասում ամրապնդվում է, հետո ռեգիոնը դեպի միջինասիական ուղղության պլացդարմ դարձնելու համար:

Այժմ այդ գործընթացը ստացել է «միս ու արյուն»: Ընդ որում՝ այստեղ կա մի ուշագրավ հանգամանք: Թուրքիան դեր է ստանձնում Աֆղանստանում, և կարծես թե բոլորովին միարժեք չէ, որ այդ դերը ստանձնում է «հոժարակամ»:

Բայդենի հետ հանդիպումից հետո Էրդողանն ասել էր, որ իրենք Քաբուլի օդանավակայանի անվտանգության հարցերը լուծել չեն կարող, եթե չլինի ԱՄՆ լոգիստիկ աջակցություն: Ստացվում է տպավորություն, որ Էրդողանին արվել է առաջարկ, որից նա չի կարող հրաժարվել, բայց մյուս կողմից խնդրում է ԱՄՆ-ին օգնել: Առնվազն հարցի տեղիք է՝ արդյո՞ք Անկարան այդ իմաստով ստիպված է ստանձնել Աֆղանստանի բեռը, այն բանի դիմաց, որ ունենա Նահանգների աջակցությունը Ռուսաստանի և Չինաստանի հետ միջինասիական արևի տակ իր տեղն ունենալու մրցակցության համար»: