«ՀԱՊԿ-ի համար լրջագույն ռիսկեր են կուտակվում միջինասիական ուղղությամբ». Հակոբ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրել է. «Ինձ թվում է, որ Ստանիսլավ Զասը պարզապես շատ տխրել է Բելգիայի հավաքականի պարտությունից, ի վերջո Բ-ով են սկսում իր համար հարազատ վայրեր՝ Բելառուս, Բաքու, որտեղ սովորել է: Բ-ի հետ կապված Զասը հաստատ էլի կունենա հարազատ զգացումներ, ու կտխրեր, իհարկե, Բելգիայի պարտությունից: Եթե լուրջ, ապա Հայաստանում կա՞ մարդ, որի համար Զասի հայտարարությունը եղել է անսպասելի: Հազիվ թե: ՀԱՊԿ-ի համար լրջագույն ռիսկեր են կուտակվում միջինասիական ուղղությամբ: Հայաստանը այժմ ունի երկու խնդիր, դրա հետ կապված, իմ սուբյեկտիվ պատկերացմամբ իհարկե: Նախ, հենց միջինասիական ամպերի կուտակման ֆոնին անել անհրաժեշտը՝ այդ ուղղությամբ զարգացումների մանրադրամ չդառնալու համար: Եվ, երկրորդ, պատրաստ լինել այդ ուղղությամբ ՀԱՊԿ հնարավոր որոշումների կայացման գործընթացում առավելագույնս բարձրացնել իր ձայնի արժեքը: Էնպես որ, քաղաքական իմաստով Զասի հայտարարությունը պետք է դիտարկել օգտագործելիության տեսանկյունից: Այլապես, ինչպես նախորդ գրառումներից մեկում էի նշել՝ այդ իմաստով եվրասիական տիրույթից վարքագծային պատրանք հայ ժողովուրդն այլևս չունի, հազվադեպ բացառություններով գուցե»: