«Քոչարյանը, Սարգսյանը, Փաշինյանը միասնաբար հաղթեցին հայ ժողովրդին». Լևոն Զուրաբյան

Ռոբերտ Քոչարյանը, Սերժ Սարգսյանը, Նիկոլ Փաշինյանը միասնաբար հաղթեցին հայ ժողովրդին: Այս մասին «Ֆակտոր»-ի եթերում հայտարարել է ՀԱԿ փոխնախագահ Լևոն Զուրաբյանը:

«Եղել են 90-ական թվականների ծանր զրկանքները, ջանքերը, պետական կազմակերպվածությունը՝ ամեն ինչ ֆրոնտին տալու սկզբունքով, և հաղթանակ է արձանագրվել, որը պետք էր ձևակերպել դիվանագիտորեն, բերել խաղաղություն, դրանից հետո զարգացնել երկիրը։ Եվ ահա՝ Ռոբերտ Քոչարյանը, Սերժ Սարգսյանը և հայտնի անձը՝ Վազգեն Սարգսյանը, այդ հաղթանակը վիժեցրին և խաղաղություն չբերեցին։ Հետո անվտանգության, հայրենասիրության լոզունգներով տեղի ունեցավ երկրի թալան և կեղեքում, և դա բերեց նրան, որ ժողովրդի մեջ 98 թվին վիժեցվեց խաղաղ կարգավորումը և մրցավազքի մեջ ընկան Ադրբեջանի հետ, ինչն անհաղթահարելի մրցավազք էր, որում Հայաստանը հաղթելու հնարավորություն չուներ, այդ մրցավազքը ՀՀ-ն կարողանում էր պահել մի ձևով՝ աղքատացնելով սեփական ժողովրդին։ Այդտեղ կար կոռուպցիա, օբյեկտիվորեն՝ 70․000-անոց բանակ պահելու պահը, որը կարող էր լինել միայն ժողովրդի աղքատացման գնով, բերեց մի հետևանքի, որ հայ ժողովրդի մեծ մասը տարիներ շարունակ ոչ թե ազգային գոյատևման պայքար է տանում, այլ անհատական։ Մարդիկ ահավոր բեռի տակ են ընկել՝ ընտանիքներին կերակրելու, և շատերի համար հայրենասիրությունը, ազգայնականությունը, ազգային անվտանգությունը հավասարազոր դարձան կեղեքմանը, կոռուպցիային, թալանին, և սա ժողովրդի ապստամբություն էր։ Ժողովրդի զգալի մասի մեջ պետականության զգացումն այս մարդիկ մաշեցրել են։ Նիկոլ Փաշինյանն այդ ապստամբության արտահայտիչն է, նա պետական մտածողություն չունի»,- ասել է Զուրաբյանը:

Մանրամասները՝ տեսանյութում: