«Քաղաքական մեծամասնությունը հետևողականորեն «լվանում է» իր ձեռքերը Արցախից». Արթուր Վանեցյան

«44-օրյա աղետալի պատերազմից հետո Արցախում և ՀՀ-ում ստեղծված օրհասական իրավիճակը պարզապես թելադրում է մեզ ունենալ երկրորդ հակական պետության խնդիրներով զբաղվող, մշտապես գործող խորհրդարանական միավոր:

Արցախի հետ կապված հարցերը՝ այդ թվում բանակցային, կտրուկ ավելացել են: Այդ հարցերն ընդգրկում են անվտանգային և արտաքին քաղաքական բաղադրիչները, բայց նաև ներառում են հոգևոր, մշակութային, սոցիալական, կրթական և բազում այլ հարցեր: Նման հանձնաժողովի ստեղծումն ուղերձ է այն մասին, որ հայկական առաջին պետությունը Արցախի, այնտեղ ապրող ժողովրդի մասին չի մոռացել, ձեռքերը Արցախից չի լվացել, չի պատրաստվում հրաժարվել Արցախի խնդիրներով զբաղվելուց»,-ԱԺ-ում Արցախի հարցով մշտական հանձնաժողով ստեղծելու հարցի քննարկման ժամանակ ասաց «Պատիվ ունեմ» խմբակցության պատգամավոր Արթուր Վանեցյանը՝ շեշտելով. «Եթե առաջարկը մերժվի, կարող ենք հիմնավոր կասկածներ ունենալ, որ քաղաքական մեծամասնությունը, ՀՀ-ում այսօր իշխանություն կազմողները փորձում են կամ հետևողականորեն «լվանում են» իրենց ձեռքերը Արցախից, հրաժարվում Արցախից, լքում են Արցախը՝ մենք դա չենք կարող թույլ տալ։ Արցախը կա և մնում է հայկական»,- ասաց Վանեցյանը։