«Այդ երկու նկարները ժառանգություն են, կնոջս օժիտն են». Վահե Հակոբյան

Գույքի և եկամուտների հայտարարագրին վերաբերող հարց-պատասխանի ժամանակ «Քաղաքացիական պայմանագիր» խմբակցության պատգամավոր Վլադիմիր Վարդանյանը հարց ուղղեց «Հայաստան» խմբակցության պատգամավոր, ԱԺ տնտեսական հարցերի մշտական հանձնաժողովի նախագահի թեկնածու Վահե Հակոբյանին:

«Ձեր հայտարարագրում Դուք հայտարարագրել եք երկու նկար՝ Հովհաննես Այվազովսիկի և Սարյան: Մի փոքր պատմեք այդ նկարների մասին՝ ստեղծագործական ինչ ժամանկահատվածներին են վերաբերում այդ նկարները, ոնց եք ձեռք բերել, արդյոք կանխե՞լ եք, օրինակ, դրանց արտահանումը հանարապետությունից, կամ հակառակը՝ ներկրե՞լ եք դրանք Հայաստան, որպեսզի հայկական մշակութային ժառանգությունը պահպանվի»,- հարցրեց Վարդանյանը:

Պատասխանելով՝ Վ. Հակոբյանն ասաց. «Ես շատ ուրախ եմ, որ իմ ունեցվածքի վերաբերյալ էսպիսի հետաքրքրություն եք ցուցաբերում, բայց պիտի ասեմ՝ դա իմ կնոջ սեփականությունն է եղել, որն իրեն եկել է ժառանգություն ու Հայաստանում է: Դա Այվազովսկու փոքրիկ նկար է, եթե ճիշտ եմ հիշում՝ կոչվում է «Փոթորիկ». առանձնապես արժեք չունի: Այդ երկու նկարները ժառանգություն են, կնոջս օժիտն են, եթե ուզում եք էդպես ասեմ»: