«Ես խոսում եմ գանձից, դուք՝ տանձից»․ Ռուստամյանը՝ Աղաջանյանին

Այսօր, ԱԺ նիստում «Հայաստան» խմբակցության պատգամավոր Արմեն Ռուստամյանը, դիմելով ՔՊ-ական, «Արտաքին հարաբերությունների մշտական հանձնաժողովի» նախագահի թեկնածու Էդուարդ Աղաջանյանին նշեց, որ ԱԺ մեծամասնությունը մերժեց Արցախի հարցով առանձին հանձնաժողով ստեղծելու ընդդիմության առաջարկը, ուստի շատ հարցեր, Ռուստամյանի խոսքով, տեղափոխվելու են «Արտաքին հարաբերությունների մշտական հանձնաժողով»։
Ռուստամյանի՝ Արցախում ծառացող խնդիրների վերաբերյալ հարցին ի պատասխան՝ Աղաջանյանը նշեց, որ բոլոր հարցերը լուծելի են, ապա նշեց, որ Հայաստանը վերջին 25-30 տարիների ընթացքում զբաղված է եղել ժամավաճառությամբ։
«Պարո՛ն Աղաջանյան, ես զարմանում եմ, դուք լսեցի՞ք իմ հարցը, ես ինչ եմ հարցնում, դուք ինչ եք պատասխանում․․․ Ես խոսում եմ գանձից, դուք՝ տանձից։ Ես խոսում եմ մեր առջև առաջացած մարտահրավերներից, դուք՝ ինչի հասանք ստեղ․․․ Նախ մենք հաղթանակ ենք բերել, դուք հաղթանակը մսխել եք»,- արձագանքելով Աղաջանյանին՝ ասաց Ռուստամյանը։