Ողբերգություն Ատլանտյան օվկիանոսում. տասնյակ ներգաղթյալ մահացել է քաղցից ու ծարավից

Միգրացիայի միջազգային կազմակերպությունը հայտնում է, որ ավելի քան 50 ապօրինի ներգաղթյալ է մահացել Ատլանտյան օվկիանոսում քաղցից ու ծարավից: Աֆրիկյան տարբեր երկրներից շուրջ 54 ներգաղթյալ փորձել է նավով հասնել Կանարյան կղզիներ: Օգոստոսի 2-ին Մարոկկոյի ափերից հեռացած նավը 1 կամ 2 օր անց տեխնիկական խնդիրների պատճառով չի կարողացել շարունակել իր ճանապարհը: Եվս մի քանի օր անց սպառվել են նավի սննդի ու ջրի պաշարները: Մարդիկ սկսել են մեկը մյուսի հետևից մահանալ:

Երկուշաբթի օրը նավը հայտնաբերվել է մավրիտանական լողափին՝ Նուադիբու քաղաքի մերձակայքում: Ափամերձ պահակախմբի ծառայողները նրանում հայտնաբերել են միայն 7 ողջ մնացածի՝ 1 կնոջ և 6 տղամարդու: 47 մարդ քաղցից ու ծարավից մահացել է:

Հայտնի է, որ նավում եղել են 11 կին, 43 տղամարդ, այդ թվում՝ 3 երեխա: