«Կարո՞ղ ենք դիտարկել, որ Բաքուն դժգոհ է հանդիպումից»․ Հակոբ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրել է. «Եթե Միրզոյան-Լավրով հանդիպումից հետո Ադրբեջանը մահացու կրակում է Երասխում, կարո՞ղ ենք դիտարկել տարբերակ, որ Բաքուն դժգոհ է այդ հանդիպման արդյունքից: Հարցն այստեղ իհարկե նաև այն է, թե արդյո՞ք դժգոհ է նաև Ռուսաստանը: Թեև, մի քանի անգամ ասել եմ, որ այն կարծիքին չեմ, թե Բաքուն առանց ՌԴ չի գնա սահմանային սադրանքի: Լավ էլ կգնա, ունի այդքան կարողություն, եթե չկա հենց ռուսների հետ ֆիզիկական բախման ռիսկ:
Միաժամանակ, հարկ է նկատել, որ Երասխում Ալիևի մահաբեր կրակոցը տեղի է ունենում Հայաստանի հետ հարաբերություն կարգավորելու պատրաստակամության վերաբերյալ Էրդողանի՝ վերջին մի քանի օրերին բավականին հաճախ կրկնած մտքի ֆոնին: Նշել եմ, որ Մոսկվայից բացի, մյուս սուբյեկտը, որ խիստ զգայուն է այդպիսի հեռանկարի հանդեպ՝ Բաքուն է: Ինչ խոսք, հասկանալի է, որ Էրդողանի հայտարարությունները դեռ չեն նշանակում որևէ բան հայ-թուրքական հարաբերության կարգավորման առարկայական ընթացքի տեսանկյունից, բայց որևէ բան այդուհանդերձ նշանակում են, եթեև օրինակև դրանց հանդեպ բավականին զգայուն է գտնվում ռուսաստանցի բազմափորձ քաղաքագետ-պատմաբան Ստանիսլավ Տարասովը, որն անկասկած ռուսական փորձագիտական մտքի ծանր հրետանուց է»: