Կիրակի, 24 հոկտեմբերի, 2021 թ.
|
Ստեփանակերտում`   +18 °C

«Չկա հարցի պատասխանը, թե՝ իսկ ինչպե՞ս պաշտպանվել այդ Թուրքիայից»․ Հակոբ Բադալյան

«Չկա հարցի պատասխանը, թե՝ իսկ ինչպե՞ս պաշտպանվել այդ Թուրքիայից»․ Հակոբ Բադալյան
156
Ուրբաթ, 24 սեպտեմբերի, 2021 թ., 18:30

Քաղաքական մեկնաբան Հակոբ Բադալյանի գրառումը. «Հնչում է կարծիք Թուրքիայի ծավալապաշտ նկրտումների, հավակնոտ քաղաքականության մասին, այն, ինչի մասին բոլորս խոսում ենք, արձանագրում, ցավոք սրտի նաև զգացել ենք ծանր կորստով: Այդ գնահատականի համատեքստում թիրախավորվում է Թուրքիայի հետ հարաբերության, խոսելու թեման, թե ինչպես խոսես այդ նկրտումներով ագրեսիվ Թուրքիայի հետ: Չկա հարցի պատասխանը, թե՝ իսկ ինչպես պաշտպանվել այդ Թուրքիայից, որը բազմապատիկ գերազանցում է քո՝ անգամ հնարավոր առավելագույն ներուժը: Բնական է, որ դա անհնար է անել առանց համարժեք ուժեղ օգնության կամ հովանու: Եվ այստեղ այդպիսին դիտվում է Ռուսաստանը:
Հետո, այդ դիտողները նաև խոսում են Ռուսաստանի վրա Թուրքիայի ահռելի ներգործության մասին, արձանագրում դա: Ընդ որում, այստեղ նրանք օբյեկտիվորեն արձանագրում են եղածը: Պետք է թերևս հետևի տրամաբանական եզրահանգում՝ եթե մեզ համար ահռելի սպառնալիք Թուրքիան մեծ ներգործություն ունի ՌԴ վրա, ՌԴ քաղաքականության ձևավորման վրա, ապա՝ կամ մենք պետք է փնտրենք Թուրքիայից մեզ հուսալի պաշտպանող այլ սուբյեկտ, որի վրա Անկարան չունի այդպիսի մեծ ներգործություն, կամ մենք պետք է որևէ կերպ կարողանանք մտնել այդ Թուրքիայի հետ հաղորդակցության մեջ, որպեսզի չմնանք այն պաշտպանի հույսին, որն ինքը շատ առումներով ունի Թուրքիայի ներգործությունից պաշտպանվելու խնդիր:
Բայց, չի հետևում թե մեկ, թե մյուս եզրահանգումը, այլ ընդամենը պարզունակ պնդում՝ ինչպես կարելի է խոսել, կամ մտածել ագրեսիվ ու հավակնոտ Թուրքիայի հետ խոսելու մասին:
Այլ բան չի մնում քան եզրակացնել, որ այդ մտայնությունը կամ պարզապես քաղաքական անհամարժեքության, կամ Հայաստանի դեմ դիտավորության դրսևորում է: Երկու դեպքում էլ մեծ կարող է լինել հետևանքի գինը: Հայաստանի համար ռազմավարական անհրաժեշտություն է առավելագույնն անել ռուս-թուրքական՝ թե պայմանավորվածությունների, թե հակադրությունների առաջնագծի «կարգավիճակից» դուրս գալու համար»:

Աղբյուրը`   Հակոբ Բադալյան