Խնդիրը ոչ միայն չի լուծվել, այլև անհասկանալի է՝ ինչ պայմանավորվածության մասին է խոսքը․ հայտարարություն

«Ֆիզգորոդոկ Երևան» ֆեյսբուքյան էջը հայտարարություն է տարածել. «Նախորդ ուրբաթ օրը «ՖիզԳորոդոկում» պատգամավորների, քաղաքապետարանի տեսչական մարմնի, «ԳազՊրոմի» ներկայացուցչի այցից հետո մեզ հստակ տեղեկացրին, որ
- «Ռատկո» ՍՊԸ-ն թույլ է տվել շինհրապարակի կազմակերպման լուրջ խախտում՝ ցանկապատից ներս թողնելով գազատար խողովակը
- Ծանր շինտեխնիկան աշխատում է գազատար խողովակի հարևանությամբ, ինչը վտանգի աղբյուր կարող է հանդիսանալ բնակիչների համար
- «Ռատկո» ՍՊԸ-ն պարտավոր է երեք աշխատանքային օրվա ժամկետում լուծում տալ այս հարցին, հակառակ դեպքում «ԳազՊրոմը» կդիմի ոստիկանություն՝ աշխատանքների հնարավոր կասեցման պահանջով:
Հաշվի առնելով այս ընթացքում եղած ոչ աշխատանքային օրերը՝ նշված ժամկետը լրանում էր երեկ:
Ավելի ուշ մեզ տեղեկացրին, որ եռօրյա ժամկետը վերաբերում է «ԳազՊրոմ» դիմում ներկայացնելուն և ոչ՝ խնդիրը լուծելուն:
Այսօր մեզ տեղեկացրին, որ «Ռատկո» ՍՊԸ-ն և «ԳազՊրոմը» պայմանավորվածություն են ձեռք բերել՝ խնդիրը լուծել՝ առանց որոշակի ժամկետներ նշելու:
Փաստացի արձանագրում ենք, որ բնակիչների համար ՎՏԱՆԳ հանդիսացող խնդիրը ոչ միայն չի լուծվել, այլև անհասկանալի է, թե ինչպիսի պայմանավորվածության մասին է խոսքը և ինչ ժամկետների:
Իսկ ինչի համար էր պաշտոնական հանձնախմբի այցը, ինչի համար էին հավաստիացումները, որ եռօրյա ժամկետում պիտի պարտավորվեին լուծել խնդիրը»։