«Թեհրանը պատրա՞ստ է Հայաստանի հետ տնտեսական «զորավարժությունների»». Հակոբ Բադալյան

Քաղաքական մեկնաբան Հակոբ Բադալյանի գրառումը. «Որքան հասկանում եմ, հայ ժողովուրդը իր փրկությունն սկսում է «գտնել» Իրանի զորավարժություններում: Սա ծիծաղ կառաջացներ, եթե չվերաբերեր լրջագույն հարցի: Եթե մի քիչ ծայրահեղացնենք, մենք հինգ րոպե ենք պակաս գնահատականներից, թե Իրանը այդ զորավարժություններն անում է հենց Հայաստանի համար:
Իրականում, Իրանի գործողություններում բուն մոտիվը թերևս մենակ մնալու, խաղից դուրս մնալու զգացումը կամ գիտակցումն է, հատկապես Մինսկի խմբի համանախագահության աշխուժացման միտումների ֆոնին: Թեհրանը լավ է հասկանում, որ, եթե կա աշխուժացման գործնական միտում, ուրեմն կան որոշակի նվազագույն պայմանավորվածություններ եւ տակտիկական փոխըմբռնում առնվազն չորսի միջև՝ ԱՄՆ, Ռուսաստան, Ֆրանսիա և Թուրքիա:
Մենք իհարկե ունենք տարբերակ՝ համերաշխորեն այս անգամ էլ խաղից դուրս մնալ Իրանի հետ, հայտարարելով, որ դա մեր փրկությունն է: Միայն թե արժե լուրջ մտածել, որովհետև խաղ վերադառնալիս Իրանը հազիվ թե մեզ վերցնի իր հետ:
Ըստ այդմ, զորավարժություններով հանդերձ, Իրանի պարագայում կա թերևս մի կոնկրետ հարց՝ Թեհրանը պատրա՞ստ է Հայաստանի հետ տնտեսական «զորավարժությունների», այսինքն հայ-իրանական խոշոր տնտեսական նախագծերի ազդարարման: Իհարկե նույն հարցը կարող ենք տալ Հայաստանի հանդեպ՝ իսկ Հայաստանը պատրա՞ստ է: Այդուհանդերձ, սա է չափիչը, ոչ թե զորավարժությունները:
Այլապես լսում ես հայաստանյան որոշ դիտարկումներ, թվում է, թե Իրանը ուր որ է մեզ համար ազատագրելու է պատերազմում կորցրած տարածքները»: