«Standard & Poor's-ի վարկանշավորումը որևէ բանով տարբերվո՞ւմ է Moody's-ի և Fitch-ի ռեյտինգավորումից». վարչապետ

S&P միջազգային գործակալությունը վարկանիշ է շնորհել Հայաստանի Հանրապետությանը: Կառավարության նիստի մեկնարկին հայտարարեց վարչապետ Նիկոլ Փաշինյանը: Ֆինանսների նախարար Տիգրան Խաչատրյանը մանրամասնեց՝ առաջին տարին է, որ Standard & Poor's կազմակերպությունը վարկանշել է ՀՀ-ին ու շնորհել ազգային արժույթով ու արտարժույթով երկարաժամկետ պարտավորությունների թողարկման «B+» սուվերեն վարկանիշ՝ դրական հեռանկարով:

Վարչապետը փոխվարչապետ Մհեր Գրիգորյանից հետաքրքրվեց՝ «այս վարկանշավորումը որևէ բանով տարբերվո՞ւմ է Moody's-ի և Fitch-ի ռեյտինգավորումից»: «Հեղինակավոր գործակալությունների վարկանշավորումները որքան շատ լինեն, այդքան համարվում է ավելի ճշգրիտ ու դիվերսիֆիկացված»,- արձագանքեց Գրիգորյանը: Էկոնոմիկայի նախարար Վահան Քերոբյանն էլ հավելեց, որ ի տարբերություն Moody's-ի և Fitch-ի, որոնք տվել էին կայուն հեռանկարով, Standard & Poor's-ը տվել է դրական հեռանկարով վարկանիշ: