«Ճակատենում ճանապարհը հիմա օգտագործվում է նույն ռեժիմով, բայց մտավախություն ունեմ, որ կարող է վերածվել մաքսակետի». Փարսյան

«Մենք ներկա դրությամբ տեղեկություն չունենք՝ դա մաքսակետ է, թե ինչ է, միայն ունենք այն տեղեկությունը, որ տնակ է տեղադրվել հենց անմիջապես ճանապարհի մոտ: Ճանապարհը հիմա օգտագործվում է նույն ռեժիմով, բայց մտավախություն ունեմ, որ դա կարող է վերածվել մաքսակետի»,- Այս մասին այսօր՝ Կապանում ՏԻՄ ընտրություններին քվեարկելուց հետո լրագրողների հետ զրույցում ասել է «Շանթ» դաշինքի քաղաքապետի թեկնածու, Կապանի ներկայիս քաղաքապետ Գևորգ Փարսյանը՝ անդրադառնալով այն լուրերին, որ Գորիս- Ճակատեն ճանապարհի մոտ հնարավոր է ադրբեջանական մաքսակետ տեղադրվել։ Նա նաև տեղեկացրեց, որ Հայաստանի քաղաքացիները նախկինի պես կարողանում են օգտագործել այդ ճանապարհը։