«Մենք հիմք ընդունում ենք 1926 թ․ քարտեզը, բայց Ռուսաստանն առաջարկել է 1974-ի քարտեզով առաջ շարժվել»․ Ա․ Եղոյան

«Կան մի շարք ռազմական քարտեզներ, մի մասը հաստատված է Հայկական ԽՍՀ-ի և Ադրբեջանական ԽՍՀ-ի կողմից, խոսքը 1926 թվականի քարտեզի մասին է, որից հետո եղել են մի շարք վերաձևումներ, որոնք, ըստ էության, չեն էլ հաստատվել, այլ եղել են ավելի ցածր մակարդակում, և վերջինը 1974-ի ռազմական քարտեզն է: Ընթացքում փոփոխություններ եղել են, բայց ոչ ամեն տեղ»,- այսօր ԱԺ-ում, լրագրողների հետ զրույցում ասաց ՔՊ-ական պատգամավոր Արման Եղոյանը:

Շարունակելով խոսքը՝ Եղոյանն ասել է․ «Մենք հիմք ընդունում ենք 1926 թվականի քարտեզը: Բայց մենք ոչ բոլոր փաստաթղթերին համապատասխան քարտեզները ունենք: Կան բազմաթիվ քարտեզներ, որոնք մենք չունենք, ոչ էլ Ադրբեջանն ունի, այլ ունի ՌԴ գլխավոր շտաբը, և Ռուսաստանն առաջարկել է դրանով առաջ շարժվել: Դեմարկացիան ու դելիմիտացիան շատ բան կարող են փոխել: Այս պահին իրավիճակը կայունացնելու համար մեզ առաջարկվեց այս քարտեզը, որը ԳՇ կողմից վերջին հաստատված քարտեզն է՝ 1974 թվականի»։