«Այն արարքները, որոնք մեղսագրվում են Մամիկոն Ասլանյանին, հանցագործություն համարվել չեն կարող»․ փաստաբան

«Մեղադրանքն ակնհայտ ապօրինի է՝ բազմաթիվ հանգամանքներից ելնելով, որովհետև չկար մեղադրանքի գեթ մեկ տող, տառ, որ կհամապատասխաներ օրենքին»,- լրագրողների հետ զրույցում ասաց «Մամիկոն Ասլանյան» կուսակցությունների դաշինքի Վանաձորի համայնքապետի թեկնածու Մամիկոն Ասլանյանի պաշտպան Լուսինե Սահակյանը։ Նրա խոսքով՝ այն արարքները, որոնք մեղսագրվում են Մամիկոն Ասլանյանին, հանցագործություն համարվել ուղղակի չեն կարող․ «Նա օրենքով սահմանված կարգով է գործել՝ իր լիազորությունների շրջանակում և օրենքի տառին համապատասխան»:

Փաստաբանը նշեց, որ «հիմա ուղիղ միջամտություն է կատարվում, և հակասահմանադրական քայլեր են արվում, ժողովրդի իշխանության դեմ է ուղիղ գնում իշխանությունը այսպիսի քաղաքական հետապնդում իրականացնելով»։

Հիշեցնենք՝ Երևան քաղաքի ընդհանուր իրավասության դատարանի Աջափնյակի նստավայրում քննվում էր Վանաձորի նախկին քաղաքապետ Մամիկոն Ասլանյանին կալանավորելու միջնորդությունը։ Դատարանը հեռացել է խորհրդակցական սենյակ որոշում կայացնելու։ Փաստաբանների խոսքով՝ ոոոշման հրապարակման ժամը դեռ հայտնի չէ։