«Քոչարյանը պատրա՞ստ է նման սցենարի»․ Սուրեն Սուրենյանց

Քաղաքագետ Սուրեն Սուրենյանցի գրառումը․ «Երեկվա ասուլիսում Ռոբերտ Քոչարյանը հնարավոր է համարել գոնե նախկին ԼՂԻՄ սահմանների վերականգնումը, Շուշին և Հադրութը վերադարձնելը։
Իհարկե, սա ավելի իրատեսական օրակարգ է, քան ԼՂՀ միջազգային ճանաչման հետապնդումը։
Մյուս կողմից, չեմ կարծում՝ Քոչարյանն արկածախնդիր է ու կարծում է, թե Շուշիի ու Հադրութի դեօկուպացիան հնարավոր է պատերազմի միջոցով։
Բնականաբար, երկրորդ նախագահը նկատի ունի դիվանագիտական ճանապարհը։
Բայց բանակցությունները ենթադրում են փոխզիջում. եթե հայկական կողմը դնի ԼՂԻՄ սահմանների վերականգնման հարց, Բաքուն դրա դիմաց պահանջելու է Ադրբեջանի տարածքային ամբողջականության ճանաչում։
Ըստ այդմ, Շուշիի ու Հադրութի դեօկուպացիային իրատեսական է հասնել, եթե հայկական կողմը հետապնդի Ադրբեջանի կազմում ԼՂ վարչատարածքային լայն ինքնավարության օրակարգ՝ միջազգային երկարաժամկետ երաշխիքներով։
Այս հարցում Հայաստանն, անշուշտ, կունենա նաև միջազգային լուրջ դաշնակիցներ։
Այս տարբերակը կարող է երաշխավորել Արցախի առնվազն հայկականությունը։
Քոչարյանը և այլք, ովքեր խոսում են դեօկուպացիայից, պատրա՞ստ են նման սցենարի։
Եթե ոչ, ապա երեկ հնչել է հերթական պոպուլիստական հայտարարությունը»։