«Պետք է կարողանանք տարածաշրջանի համար խաղաղ դարաշրջան բացելու մեր օրակարգը հասցնել լրումին»․ Փաշինյան

«Մենք պետք է հնարավոր ամեն ինչ անենք, որ հաջորդ սերունդներին և հաջորդ կառավարություններին ոչ թե շարունակաբար բարդացող խնդիրներ ժառանգենք, այլ ժառանգենք կայուն, ամրագրված իրավիճակ, ինչն առանցքային նախապայման է երկրի հետագա բնականոն զարգացման համար»,- այսօր Կառավարության տարեվերջյան նիստում հայտարարեց վարչապետ Նիկոլ Փաշինյանը:

«Մյուս կողմից պետք է հասկանանք, որ սա հեշտ չէ: Ինչքան էլ պատասխանատվություն վերցնելու և որոշումներ կայացնելու մեր պատրաստակամությունը մեծ է, պետք է արձանագրենք, որ այդ որոշումների կայացումը գրեթե միշտ միայն մեզնից չի կախված»,- նկատեց նա։

«Պետք է կարողանանք մեր արտաքին քաղաքականությամբ նաև բոլոր այն սուբյեկտներին, ումից կախված է նաև որոշումների կայացումը, հասունանցնեք մի այնպիսի գործընթաց, որտեղ մենք ի վերջո, կարողանանք ֆիքսել իրավիճակը, տարածաշրջանի համար խաղաղ դարաշրջան բացելու մեր օրակարգը կարողանանք հասցնել լրումին: Սա բարդ գործընթաց է»,- հավելեց վարչապետը: