«Ռուսներն իրենք են բացել հանրության աչքերը՝ քայլ առ քայլ»․ Հակոբ Բադալյան

Քաղաքական մեկնաբան Հակոբ Բադալյանի գրառումը․ «Հայաստանում կան քաղաքական ուժեր, որոնք իրենց միակ առաքելությունը համարում են պարբերաբար կրկնել, հանրությանը համոզել, որ ռուսները մեզ չեն օգնելու: Ու ամեն առիթ օգտագործում են ձայնային տոնը առավել թեժացնելու համար: Սա կլիներ զավեշտալի, եթե չլիներ տխուր:
Զավեշտալի այն իմաստով, որ փաստորեն կան քաղաքական ուժեր, որոնք մտածում են, թե Հայաստանի հանրությունը ինչ որ պատրանքներ ունի ռուսների օգնության առումով, մտածում է, թե ռուսները օգնելու են, իսկ իրենք էլ փորձում են բացել հանրության աչքերը: Հարգելիներ, ռուսներն իրենք են բացել հանրության աչքերը՝ քայլ առ քայլ, շատ վաղուց, առնվազն 2013-15-ից սկսած՝ մինչև 44-օրյա պատերազմ:
Հետևաբար, եթե դուք անկեղծորեն մտածում եք, թե հանրության աչքերը պետք է բացել, ապա անկեղծ մոլորության մեջ եք, իսկ եթե ոչ, ապա ընդամենը չունենալով այլ ասելիք, զբաղված եք շատ վաղուց հայտնին ամեն օր կրկնելով և այդպիսով «պատասխանատվությունը» հանրության վրա թողնելով՝ թե մենք ահա ամեն ինչ գիտենք ու կարող ենք, բայց էս հանրությունը դարձյալ պատրանքների մեջ է:
Եվ սա էլ արդեն հենց տխուրն է՝ Հայաստանի քաղաքական դաշտի առումով:
Իսկ հանրությունը վաղուց ռուսների առումով որևէ պատրանք չունի, իսկ ով էլ ուներ, այդ պատրանքը ցրվեց 44-օրյա պատերազմով: Պարզապես հանրությունը պատրանք չունի նաև այն առումով, թե ռուսներին այսօր թողնում ենք, վաղը դառնում ենք որևէ այլ մեկի դաշնակից և այն, ինչ չեն անում ռուսները, սկսում են անել այլք: Դրա համար, հանրությունը ակնկալում է քաղաքական ուժերից առավել առարկայական առաջարկներ, թե ինչ ենք անում մենք՝ բացի ռուսներին թողնելուց և ութ րոպեում, ութ օրում կամ ութ շաբաթում այլ դաշնակից «բռնելուց»: Ինչ ենք անում մենք, հաշվի առնելով նույն ռուսներից բխող վտանգը և նույն ռուսների հետ Արևմուտքի ու Արևելքի քաղաքական առևտրի հանգամանքը:
Հանրությունը սա է ուզում լսել, այլապես, թե Ռուսաստանն ինչ է՝ քաղաքական ուժերիդ ինքը բազմակի ավելի լավ կարող է պատմել կամ բացատրել»: