«Հայկական բանակն արել է գրեթե անհնարը՝ ստացած չլինելով այն, ինչ հնարավոր էր». Հակոբ Բադալյան

Քաղաքական մեկնաբան Հակոբ Բադալյանի գրառումը. «Հայկական բանակն անկախ պետականության երեք տասնամյակի հատկապես երկրորդ կեսում արել է գրեթե անհնարը՝ ստացած չլինելով այն, ինչ հնարավոր էր: Որովհետև Հայաստանում հնարավորն ու անգամ անհնարը իր համար ապահովում էր կոռուպցիոն բուրգը:

Շնորհավոր բոլոր իրական զինվորների ու սպաների տոնը: Փառք և վառ հիշատակ Հայաստանի ու Արցախի պաշտպանության համար զոհվածներին:

Վառ հիշատակ նաև այն տղաներին, որոնք լինելով բանակի իրապես արժանապատիվ ու նվիրված սպա և զինվոր, պատրաստ լինելով զոհվել պետության անվտանգության համար, դարձել են բանակում հակապետական և անմարդկային բարքերի զոհ:

Մաղթենք հայկական բանակին, որ թե՛ հանրայնորեն, թե՛ փորձագիտական, թե՛ քաղաքական, թե՛ կառավարման մակարդակներում տնայնագործական ընկալումներից և վերաբերմունքից՝ թեկուզ շատ դեպքերում միանգամայն անկեղծ ու սրտացավ, արժանանա պետական ընկալման: Եվ «մաղթենք» մեր բանակին ուժեղ, արդիական տնտեսություն, որովհետև տնտեսությունն է որևէ բանակի մարտունակության հիմքը»: