«Ի՞նչ կլիներ, եթե ընդդիմությունը չսպասեր արտերկրյա «տիկնիկավարների» հրահանգներին»․ Կարեն Հեքիմյան

Քաղաքացու իրավունքների պաշտպան» Կարեն Հեքիմյանի գրառումը. «Պարադոքսն այն է, որ Հայաստանում առկա ներքաղաքական ճգնաժամից այլևս հնարավոր է դուրս գալ միայն սահմանադրական ճգնաժամ ստեղծելով:

Սահմանադրական ճգնաժամ կարող է ստեղծել խորհրդարանական ընդդիմությունը: Տարբերակներից մեկը՝ պատգամավորական մանդատներից հրաժարվելն է:
Ինչու՞ խորհրդարանական ընդդիմությունը չի կիրառում այս ընթացակարգը:

Կա երկու բացատրություն՝ պարզ և պարզագույն:

Պարզ բացատրությունն այն է, որ Հայաստանի՝ արտերկրյա «տիկնիկավարների» սցենարով, սահմանադրական ճգնաժամ ստեղծելու համար առայժմ չկա թույլտվություն:
Իսկ ի՞նչ կլիներ, եթե, այնուամենայնիվ, խորհրդարանական ընդդիմությունը չսպասեր «տիկնիկավարների» հրահանգներին և հրաժարվեր մանդատներից: Այդ դեպքում, պատգամավորական մանդատները կստանային ընդդիմադիր դաշինքների ընտրական ցուցակներում ընդգրկված և հաջորդ համարների ներքո հանգրվանած պատգամավորության թեկնածուները: Սա է խնդիրը:

Կարծում եմ, որ խորհրդարանական ընդդիմադիր խմբակցությունները չեն կարող վերահսկել պատգամավորության թեկնածուների ամբողջ ցուցակը: Ոնց էլ լինի մի քանիսը մանդատից չի հրաժարվի: Սա էլ պարզագույն բացատրությունն է:

Համադրելով սահմանադրական ճգնաժամի չստեղծման պարզ և պարզագույն բացատրությունները, մտածեք, թե ինչ կղկղանքի մեջ ենք»: