«Չնայած ջախջախված ենք, կապիտուլացված` բանակցային պրոցեսը վերականգնելու հնարավորություն ունենք»․ Սերժ Սարգսյան

Այսօր տված հարցազրույցում պատասխանելով հարցին՝ հանգուցալուծված չէ՞ Ղարաբաղյան հակամարտությունը, ՀՀ երրորդ նախագահ Սերժ Սարգսյանն ասել է․ «Իմ խորին համոզմամբ՝ ոչ, հանգուցալուծված չէ: Եվ դա միայն իմ համոզմունքը չէ: Դա նաև համանախագահների հայտարարություններն են»:

Շարունակելով խոսքը, Սերժ Սարգսյանն ասել է․ «Կարծում եմ՝ մեր հասարակության այն հատվածը, որը համարում է, որ Արցախը հայկական է, այն մասը, ով համարում է, որ մենք ի վիճակի ենք ուղղել մեր մեջքը, ես կոչ եմ անում բոլոր այդ մարդկանց, որ համախմբվենք ու սրանից պահանջենք, որ դադարեցնեն այդ քաղաքական մուրացկանությունը: Խաղաղություն աղերսելը երբեք չի բերել խաղաղության։ Իմ ասածն այն չէ, որ պետք չէ ձգտել խաղաղության, ընդհակառակը, իմ ասածների մեջ՝ և՛ սկզբում, և՛ հիմա, խնդրում եմ, որ որևէ մեկը ռևանշի տարր էլ չփնտրի: Իմ ասածը հետևյալն է, որ մենք չնայած ջախջախված ենք, չնայած կապիտուլացված ենք՝ մենք ունենք հնարավորություն բանակցային պրոցեսը վերականգնելու»։