«Որևէ մեկի համար նորություն չէ հայկական երկու կաթողիկոսությունների մրցակցությունը»․ Հակոբ Բադալյան

Քաղաքական մեկնաբան Հակոբ Բադալյանի գրառումը. «Գարեգին երկրորդը հայրապետական այցով մեկնել է ԱՄՆ, որտեղ կհանդիպի բարերարներին ու կքննարկի իրականացվող ծրագրերը: Այլ կերպ ասած, կաթողիկոսը մեկնել է ֆինանսական հարցերով: Նորմալ է, ի վերջո եկեղեցին «օդով չի սնվում»: Այլ հարց է, թե ինչ արդյունավետություն ունեն իրականացվող ծրագրերը: Արդյունավետություն ոչ միայն զուտ ֆինանսական իմաստով, այլ նաև «որակական»՝ դրանց հանրօգուտ, իսկ հարկ եղած դեպքում անգամ որոշակիորեն պետական մասշտաբի նշանակության տեսանկյունից:
Միաժամանակ, Գարեգին երկրորդի այցն ԱՄՆ հատկանշական է «հայկական երկրորդ կաթողիկոսության»՝ Անթիլիասի առաջնորդ Արամ Առաջինի նախաձեռնության ֆոնին, որի վերաբերյալ նա հավաք էր անցկացրել երկու-երեք շաբաթ առաջ: Դրա ընթացքում նա հայտարարել էր, թե Սփյուռքը մաշվում ու գունաթափվում է, այլ կերպ ասած՝ «չկա նախկին էնտուզիազմը» «ավանդական» կառույցների, այդ թվում եկեղեցու շուրջ: «Սփյուռքի տարվա» հռչակումն ունի թերևս այդ նպատակը՝ մոբիլիզացիա, քանի որ դրանից կախված են նաև ֆինանսա-տնտեսական հոսքերը:
Այդ առումով, Գարեգին երկրորդի այցն ԱՄՆ թերևս նաև ինչ -որ իմաստով Արամ Առաջինի նախաձեռնության հանդեպ պատասխան քայլն է, այսպես ասած մրցակցության դրսևորումը: Եվ սա, իհարկե, որևէ մեկի համար թերևս նորություն չէ հայկական երկու կաթողիկոսությունների մրցակցությունը: Այդ երևույթը իհարկե տխուր իմաստով լավագույնս բնորոշում է ներհայկական կյանքը տասնամյակներ «առաջնորդած», գերակշռած մտածողության որակը»: