«ԲԴԽ անդամները ներողությունով չպետք է պրծնեն, նրանք պետք է հրաժարական տան»․ պաշտպան

«Երբ այս քրեական գործը կարճվի, իրավապահ մարմինների մի շարք ներկայացուցիչներ ներողություն են խնդրելու Բախշիյանից: ԲԴԽ անդամները ներողությունով չպետք է պրծնեն, նրանք պետք է հրաժարական տան և դուրս գան։ Նրանց վարքագիծն ուղղակի անթույլատրելի էր։ Նրանց հարցադրումները գործընթացի ընթացքում ուղղակի ծիծաղելի էին։ Իրավաբանությանը չառնչվող մոտեցումներ էին։ Ձայնագրությունը կա, կհրապարակենք, թե որոշ դատավոր-անդամներ ինչ ոգևորվածությամբ էին կրկնում դատախազի խոսքերը, որոնք զուտ դատողություններ էին»,-Աջափնյակի նստավայրի դիմաց, լրագրողների հետ զրույցում, ասաց փաստաբան Արսեն Սարդարյանը՝ անդրադառնալով Բարձրագույն դատական խորհրդի կողմից Սյունիքի մարզի ընդհանուր իրավասության դատարանի դատավոր Բորիս Բախշիյանի նկատմամբ քրեական հետապնդում հարուցելու, ինչպես նաև ազատությունից զրկելու համաձայնություն տալու որոշմանը։