«Ռուսաստանը չունի և չի ունեցել Ուկրաինան «գրավելու» մտադրություն». Հակոբ Բադալյան

Քաղաքական մեկնաբան Հակոբ Բադալյանի գրառումը. «Ռուսաստանը չունի և թերևս չի ունեցել Ուկրաինան «գրավելու» մտադրություն: Եթե կա ռազմական գործողության նպատակ, ապա դա թերևս Դոնբասի ուղղությամբ այնպիսի իրավիճակի ստեղծումն է, պայմանական ասած՝ «մսաղացի» ստեղծումը, որը կլինի մինսկյան համաձայնությունները կատարելու ուղղությամբ ճնշում:

Այլ կերպ ասած, կստացվի, որ Ռուսաստանն Ուկրաինա չի ներխուժել, հետևաբար չկա պատժամիջոցի հիմք: ԱՄՆ ու արևմտյան դաշնակիցները փորձում են Կիևին բերել քաղաքական ճանապարհով պայմանավորվածության դաշտ, ինչը գործնականում թվում է անհնարին: Կմնա ռազմական ճանապա՞րհը:

Այսօր Պեկինում ռուս-չինական հայտարարությունում Չինաստանն աջակցություն է հայտնում Ռուսաստանի անվտանգային պահանջներին, որ ուղղված են Արևմուտքին, իսկ Ռուսաստանն էլ աջակցություն է հայտնում թայվանի նկատմամբ Չինաստանի հավակնություններին: Սա նշանակո՞ւմ է, որ Պեկինը տալիս է Մոսկվային ռազմական գործողության թիկունքային երաշխիք, որը, օրինակ, կարող է պետք գալ Կենտրոնական Ասիայում:

ԱՄՆ պետքարտուղարությունը հայտնում է, որ տնօրինում է տեսանյութ, որը ՌԴ ռազմական գործողության քարոզչական մեկնարկի մասին է: Բայց, պետքարտուղարությունը հրաժարվել է լրագրողներին ներկայացնել այդ տեսանյութի առկայության ապացույց և ասել, որ լրագրողները թող հավատան իրենց:

Խոսքը հավանաբար քարոզչական նյութի մասին է, որը կպատմի Դոնբասի ուղղությամբ ուկրաինական հարձակման մասին և տեղի ռուսալեզու բնակչությանը պաշտպանելու անհրաժեշտության մասին: Ենթադրաբար:

Հետաքրքիր է՝ պետքարտուղարությունն ինչո՞ւ չի հանրայնացնում այդ նյութը: Չէ՞ որ դա կարող է նպաստել ռազմական գործողությունների կանխմանը: Թե՞ պահում են, որովհետև Պուտինը դեռ չունի վերջնական որոշում, իսկ երբ որոշումը կայացվի, կհանրայնացնեն տեսանյութը՝ մինչ դա կանի Մոսկվան»: