«Մի՛ հուշեք, պարոն Փաշինյան, մի՛ հուշեք»․ Խամոյանը «Փաշինյանի ժառանգորդ» անվանեց Միրզոյանին

«Երբ Դուք նշանակվում էիք Արտաքին գործերի նախարար, Նիկոլ Փաշինյանն ասում էր, որ Դուք պետք է պատասխանատվություն կիսեք։ Նախորդ հարցուպատասխանից սկսած՝ տպավորություն է, որ Դուք միայն պատասխանատվություն չեք կիսում։ Այսօր Նիկոլ Փաշինյանի փոխարեն Լուկաշենկոյին պատասխանեցիք․ պատասխանեցիք այն հարցին, թե արդյոք Նիկոլ Փաշինյանը կգնա՞ Թուրքիա, թե՞ չի գնա․․․։ Մեր թիմային, կուլիսային զրույցները, որ Նիկոլ Փաշինյանը Ձեզ է պատրաստում որպես իր ժառանգորդ, իրականությունից, փաստորեն, այնքան էլ հեռու չեն։ Հիմա՝ որպես Նիկոլ Փաշինյանի ժառանգորդ, կարո՞ղ եք ոչ միայն Լուկաշենկոյին պատասխանել, կամ, ինչպես երեկվանից սկսել եք էսպես՝ «իր պորտը տեղը դնել», նաև՝ արձագանքել Ալիևի հոխորտանքներին, քանի որ ամենավերջին նվաստացուցիչ որակումներն է Ալիևը տվել մեր երկրին, անձամբ Նիկոլ Փաշինյանին․․․»,- ԱԺ հարցուպատասխանի ժամանակ «Հայաստան» խմբակցության պատգամավոր Ագնեսա Խամոյանը չկարողացավ ավարտել ԱԳ նախարար Արարատ Միրզոյանին ուղղված հարցը, քանի որ խոսափողն անջատեցին։ Ապա, նկատելով վարչապետի և Միրզոյանի զրույցը, ասաց․ «Մի՛ հուշեք, պարոն Փաշինյան, մի՛ հուշեք․․․»։

Մոտենալով ամբիոնին՝ Նիկոլ Փաշինյանը պատասխանեց․ «Ուզում եմ տեղյակ պահել, որ ես ոչ թե մեկ, այլ չորս ժառանգորդ ունեմ՝ Մարիամ Նիկոլի Փաշինյան, Աշոտ Նիկոլի Փաշինյան, Շուշան Նիկոլի Փաշինյան և Արփի Նիկոլի Փաշինյան»։