«Պարոն Ջհանգիրյանն ասել է, որ հրաժարական տամ՝ ինքը աշխատի ԲԴԽ նախագահ». Ռուբեն Վարդազարյան

«Երբ պարոն Ջհանգիրյանի թեկնածությունը քննարկվում էր և նա դեռ չէր ընտրվել, ես իմ դիրքորոշումը հայտնել եմ հրապարակային: Ասել եմ, որ անձը, որի 65 տարեկանը լրացել է, իրավունք չունի ընտրվել Բարձրագույն դատական խորհրդի անդամ և հիմնավորումներն այն ժամանակ տվել եմ: Դրանք նույնն են՝ ԲԴԽ անդամը հավասարեցված է դատավորի կարգավիճակին, իսկ դատավորը 65 տարեկանից հետո չի կարող պաշտոնավարել»,- այսօր ԱԺ-ում դատական համակարգի խնդիրների վերաբերյալ աշխատանքային քննարկման ժամանակ նշեց ԲԴԽ՝ լիազորությունները կասեցված նախագահ Ռուբեն Վարդազարյանը:

Շարունակելով խոսքը՝ Վարդազարյանն ասաց. «Այնուամենայնիվ Ազգային ժողովն ընտրեց պարոն Ջհանգիրյանին ԲԴԽ անդամ: Դրանից հետո ես որևէ կերպ չեմ անդրադարձել այդ հարցին, քանի որ ԲԴԽ նախագահի լիազորություններում չկա նման դիրքորոշում: Հարցն ուսումնասիրել եմ, նույնիսկ նախապատրաստել էի մեկ փաստաթուղթ, օրենքի համաձայն հայտարարություն՝ երբ անձի 65 տարին լրանում է, ԲԴԽ-ն հայտարարությամբ դիմում է, և նրա լիազարությունները դադարեցնում են կենսաթոշակային տարիքը լրանալու հիմքով: Դաշտն ուսումնասիրել եմ, խորհրդակցել եմ շատ իրավաբանների հետ, սակայն անտեղ օրենսդրական բաց կար: Այնուամենայնիվ, այդ քայլը չեմ արել, որովհետև դա ապօրինություն կլիներ ԲԴԽ նախագահի կողմից: Ստացե՞լ եմ ազդակներ, թե՞ ոչ. այո, ստացել եմ: Պարոն Ջհանգիրյանն ինքն է անձամբ ասել, որ ցանկալի է՝ ես հրաժարական տամ, և ինքը աշխատի Բարձրագույն դատական խորհրդի նախագահ»: