«Դոնբասն ու Լուգանսկը Մոսկվայի համար բազմաշերտ առևտրի օբյեկտ են». Սուրեն Սուրենյանց

Քաղաքագետ Սուրեն Սուրենյանցը ֆեյսբուքյան իր էջում գրում է. «Դիվանագիտական խաղեր

Այսօր Պետդումայի պրոֆիլային հանձնաժողովը հավանության արժանացրեց, այսպես կոչված, Դոնեցկի ու Լուգանսկի հանրապետությունների ճանաչման գործընթացի մեկնարկն ազդարարող երկու բանաձև։

Իհարկե, գոնե այս պահին սա ճանաչման գործընթացի իմիտացիա է. Կրեմլում դեռևս չեն գնա նման քայլի՝ չնայած կնշեն «հանրային պահանջի» առկայությունը։
Դոնբասն ու Լուգանսկը Մոսկվայի համար բազմաշերտ առևտրի օբյեկտ են, ըստ այդմ՝ միամիտ կլինի ակնկալել, որ այդ կազմավորումները սուբեկտային ճանաչման կարժանանան։
Նման մարտավարական հնարքների դիմում է նաև Կիևը. օրինակ, այսօր Մեծ Բրիտանիայում Ուկրաինայի դեսպանն ասել էր, թե իր երկիրը կարող է հրաժարվել ՆԱՏՕ-ին անդամակցության հայտից՝ հանուն խաղաղության, հետո այդ հայտարարությունը արագ «խմբագրվեց» Կիևի կողմից։
Հակամարտող կողմերը տարբեր նախաձեռնություններով, հայտարարություններով ստուգում են միմյանց ու միջազգային հանրության արձագանքը»։