«Նման բան կարող էր միայն Հայաստանի իշխանության մտքով անցնել»․ Կարեն Հեքիմյան

313

Չորեքշաբթի, 16 փետրվարի, 2022 թ., 17:06

Քաղաքացու իրավունքների պաշտպան» Կարեն Հեքիմյանի գրառումը. «Սա 1955թ կառուցված ՀՀ ԳԱԱ Նուրբ օրգանական քիմիայի ինստիտուտի գլխավոր մասնաշենքն է: Վերջինս ընդգրկված է պատմության և մշակույթի հուշարձանների ցանկում: Շենքի դիմացի ջրավազանի տարածքում շուտով իրականացվելու է «բարբարոսա» գործողությունը՝ բազմաֆունցիոնալ շենք է կառուցվելու: Նման բան կարող էր միայն Հայաստանի իշխանության մտքով անցնել: Մեկ էլ՝ անազգ և անհայրենիք բարբարոսների:

Ինչևէ, շուտով պարզ տեսազննությամբ այս շենքն այլևս չեք տեսնելու: Փոխարենը, տարածքում կտեսնեք պարաններից կախված լվացք, սուպերմարկետ, խորտկարան, ավտոմեքենաների «լվա ինքդ» անվանմամբ լվացակետ, ավտոկայանատեղի, միգուցե նաև հավի գրիլի և Ղարսի խորովածի վաճառքի կետ:

Ի դեպ, իշխանություններին անվճար խորհուրդ տամ: Ուրեմն, Երևանի Հանրապետության հրապարակում նույնպես ջրավազան կա: Այն էլ շատրվաններով: «Բարբարոսա» գործողությունների շրջանակում, առաջարկում եմ այդ ջրավազանը առևտրի գոտու վերածել: Այնտեղ պետք է «Հրապարակ մոլ» կառուցել: Մեջն էլ՝ «Երևան սիթի»: Հա, իսկ էն Ազգային պատկերասրահի շենքը Թուրքիայի կամ Ադրբեջանի դեսպանությանը հատկացրեք: Դե, որ խաղաղություն լինի»:

Աղբյուրը` Կարեն Հեքիմյան