«Եթե քաղաքականության մեջ որոշակի փորձ չունենայիք, կասեի՝ չեք հասկանում»․ Գրիգորյանը՝ Արսենյանին

«Մեկ նախադասության մեջ հինգ անգամ խաղաղություն բառն արտասանելով՝ խաղաղության չեն հասնում։ Երբ դուք խոսում եք այն մասին, որ խաղաղության, կայունության օրակարգով եք գնում և ուզում եք պնդել, որ այս դատապարտող հայտարարությունը խաթարելու է խաղաղությունը՝ ձեր պատկերացմամբ, ապա այդ համատեքստում արդյո՞ք չի խաթարում «Շուշիի հռչակագիրը» երկու երկրրների միջև հարաբերությունների կարգավորմանը»,- այսօր՝ ԱԺ արտաքին հարաբերությունների հանձնաժողովի արտահերթ նիստում, ՔՊ-ական պատգամավոր Գուրգեն Արսենյանին ասաց «Հայաստան» խմբակցության պատգամավոր Աննա Գրիգորյանը։

«Շուշիի հռչակագրի վերաբերյալ ՀՀ ԱԳՆ-ն արել է իր հայտարարությունը․ որևէ էական բան տեղի չի ունեցել ՀՀ-ի համար մինչև այսօր, բացի վավերացումից՝ ընդամենը»,- ի պատասխան ասաց Արսենյանը՝ նշելով, որ այս պահին բաց և կոշտ քննարկումների գործընթացը միայն ավելացնում է լարվածությունը ՀՀ-ի համար։

«Եթե քաղաքականության մեջ որոշակի փորձ չունենայիք, ես ուղղակի կասեի, որ դուք չեք հասկանում, թե ինչ է նշանակում վավերացում և արդյո՞ք վավերացումն ընդամենը վավերացում է և ուրիշ ոչինչ։

Այսինքն՝ հայտարարությունից հետո երբ եղել է ԱԳՆ պատասխանը, դա իհարկե լավ է, բայց ասել, որ վավերացումն ընդամենը վավերացում է, և դրանով որևէ բան չի փոխվում, դա, մեղմ ասած, չհասկանալ է, թե ինչ է իրականում տեղի ունենում»,- Արսենյանին ասաց Գրիգորյանը։

Ավելի վաղ հայտնել էինք, որ Ադրբեջանի և Թուրքիայի խորհրդարանները վավերացրել են «Շուշիի հռչակագիրը»: