«Ավելի ցավոտ, քան 2014-ին». ինչ պատժամիջոցներ է սահմանել Արևմուտքը ՌԴ-ի նկատմամբ

ԱՄՆ նախագահ Ջո Բայդենը հայտարարել է Ռուսաստանի դեմ նոր պատժամիջոցների սահմանման մասին, որոնք չորեքշաբթի օրը կսահմանվեն ռուսական էլիտաների ու բանկերի նկատմամբ:

Նա ընդգծել է, որ պատժամիջոցները կխստացվեն՝ կախված Ուկրաինայի հանդեպ Մոսկվայի գործողություններից և շատ ավելի ուժեղ կլինեն, քան այն պատժամիջոցները, որ սահմանվել էին ԱՄՆ-ի կողմից 2014թ.-ին:

«Ես պատրաստվում եմ սկսել պատժամիջոցներ կիրառելով, որոնք շատ ավելի մեծ կլինեն, քան մեր և մեր գործընկերների քայլերը 2014 թվականին, և եթե Ռուսաստանը շարունակի այս ներխուժումը, մենք պատրաստ ենք ավելի հեռուն գնալ պատժամիջոցներով», - ասել է Բայդենը։

ԵՄ դիվանագիտության ղեկավար Ժոզեպ Բորելն էլ հայտնել է, որ Պետդումայի 351 պատգամավոր և ևս 27 ֆիզիկական և իրավաբանական անձ կենթարկվեն ԵՄ պատժամիջոցների:
«Մենք համաձայնության ենք եկել ԵՄ 27 անդամների միջև իմ առաջարկած պատժամիջոցների փաթեթի վերաբերյալ: Պատժամիջոցների այս փաթեթը շատ ցավոտ կլինի Ռուսաստանի համար: Այդ միջոցները կվերաբերեն Պետդումայի 351 պատգամավորի, ովքեր կողմ են քվեարկել նման որոշմանը: Այդ միջոցները նաև կազդեն ևս 27 անհատի և կազմակերպություն»,- ասել է նա։