«Տղերքը պայմանավորվել են 2020 թվականի սեպտեմբերի 27-ից առաջ». Վարդան Բալյան

Քաղաքական վերլուծաբան Վարդան Բալյանը ֆեյսբուքյան իր էջում գրել է. «Ռուս-ադրբեջանական ռազմավարական համագործակցության հռչակագիրը՝ բաղկացած 43 կետից, հանգամանալից վերլուծության ենթակա փաստաթուղթ է, անխոս։ Հուսով եմ, առաջիկայում մեր փորձագիտական հանրույթը անհրաժեշտ ուշադրության կարժանացնի, քանի որ կողմերի պայմանավորվածությունների զգալի մասը ուղղակիորեն առնչվում է մեր ազգային անվտանգությանը։ Կարևոր եմ համարում շեշտադրել մի քանի կարևոր հանգամանքներ։
Հռչակագրի ստորագրման արարողության ժամանակ Ադրբեջանի նախագահը բաց տեքստով հայտարարեց, որ ռազմավարական նշանակության փաստաթղթի գործնական մշակման աշխատանքները մեկնարկել են ավելի քան 1 տարի առաջ։ Իլհամ Հեյդարիչի ակնարկը թերևս հստակեցման կարիք ունի՝ տղերքը պայմանավորվել են 2020 թվականի սեպտեմբերի 27-ից առաջ։ Համատեղ Հռչակագրի 1-ին հոդվածով, ի դեպ, Ռուսաստանի Դաշնությունը ճանաչում է ռազմավարական նոր գործընկերոջ տարածքային ամբողջականությունը, պետական սահմանների անխախտելությունը։ Հոդված 11-ը ռուսերեն ներկայացնեմ՝ ․․․ решительно пресекают на своих территориях деятельность организаций и лиц, направленную против государственного суверенитета, независимости и территориальной целостности другой Стороны.
Հուսով եմ, Լենին պապիկի մասին ՌԴ նախագահի որոշ գնահատականներից ոգևորված գործիչներն ու փորձագետները կաբարեհաճեն կարդալ սույն փաստաթուղթը»։