«Մեր պետության շահերից է բխում, որ ՌԴ-ն, որքան հնարավոր է, անվնաս դուրս գա կոնֆլիկտից». Կարպիս Փաշոյան

Հրապարակախոս Կարպիս Փաշոյանը ֆեյսբուքյան իր էջում գրել է․ «Իմ համոզմամբ՝ Հայաստանի և Արցախի ճակատագրով մտահոգ քաղաքացիներն ընդամենը պետք է մեկ տրամաբանական ակնկալիք ունենան՝ ռուս-ուկրաինական պատերազմի շուտափույթ դադարեցում, քանի որ երկարատև և հյուծիչ պատերազմն Արևելյան Եվրոպայում, կարող է էականորեն թուլացնել Մոսկվայի դիրքերը Հարավային Կովկասում։

Իսկ դա էլ կարող է հանգեցնել ՀՀ-ի և Արցախի դեմ լայնամասշտաբ ագրեսիայի, ինչպես նաև Արցախի հայաթափմանը։ Այսինքն՝ մեր պետության շահերից է բխում, որ ՌԴ-ն որքան հնարավոր է անվնաս և անցնցում դուրս գա կոնֆլիկտից՝ խուսափելով արևելաեվրոպական «Վիետնամի» հեռանկարից։

Ուկրաինայի մասով կարող եմ նշել հետևյալը․ չնայած՝ Հայաստան-Ռուսաստան դաշինքի ջատագով եմ, բայց, այնուամենայնիվ, չեմ կարող անտարբեր անցնել այդ պետության ողբերգական ճակատագրի կողքով։ Այն իսկապես լուրջ պոտենցիալով, հարուստ ռեսուրսներով երկիր էր, որն իր քաղաքական վերնախավի տասնամյակներ տևող տգիտության և սխալ քաղաքականության հետևանքով հայտնվեց երկու աշխարհների բախման կիզակետում։ Ակնհայտ է, որ ԱՄՆ-ն և Ռուսաստանը որդեգրել են Ուկրաինան կիսելու, երկու Ուկրաինաներ ստեղծելու մոտեցումը։ Փաստ, որը միայն ափսոսանք է առաջացնում և հատկապես այն առումով, որ վերջին 20 տարիներին կարելի էր ամեն ինչ անել այս դառը հեռանկարից խուսափելու համար»։